57. Зиянкар жанавур

Са жанавур авай кьван, ам гьамиша жемятдиз
зиян гуз вердиш хьанвай кьван.
 Дагълара, тамара, хелвет дерейра вичи гайи
зиянрал рази тахьана, са къуз ам лап хуьруьн
 мукьув атана. Ина идал, са хъсан векь авай
 къурухда, са к1ел гьалтна. Жанавурди идаз
лагьана:
- Я ччан к1ел, вун тек я, вун дарихмиш хьанва
жеди, ша, чна са т1имил каш-мекь ийин.
К1елез идаз вич нез к1анзавайди чир хьана,
ада лагьана:
- Садра зун к1вализ хъфена, за иесидвай рух-
сат къачуна хквен, ахпа чна чи каш-мекь ийида.
К1ел гьарай ацалтна вичин иесидитн кьилив
хъфена. Жанавурди гьикьван гуьзлемишнат1ани,
мад к1ел хтана ахкъатнач. Эхир жанавурдиз
хъел атана,яваш-яваш, ттум илисиз-илисиз,
са къад-яхц1ур кам мадни виликди фена.
Идал са лам гьалтна, ида ламраз лагьана:
- Я кьей хва лам, вун ялгъуз я заз чизва вун
дарихмиш хьанвайди, заз гзапф хъсан махар чида,
ша,за ваз са-кьве мах ахъайин, ви гуьгьуьл
ачух хьуй.
Ламрпа япар хкажна, кьве к1вач чиле ак1урна,
лагьана:
- Ччан жанавур халу, заз фадлай кьулухъ ви
махарин ван хьанач, зи гзаф вил гала, амма
на заз са т1имил рухсат це, зун хъфена, зи
шарк1унтдиз нек гана, хкведа, ахпа чна яргъи
эхтилатар ийида.
 Жанавур рази хьана. Лам ар алатна катна хъфена,
мад хтанач. Тахтайла, жанавур мадни вилик фена.
Идал гьалтна са гамиш. Ида гамишдиз лагьана:
- Я кьей стха гамиш, вун вуч я, ик1 кьарадай
кьац1ана? Ша, чна ацукьна эдебдалди са кьве
суьгьбет ийин.
 Гамишдиз вич нез к1анзавайди чир хьана, лагьана:
- Ччан жанавур стха, на  лап дуьз лугьузва,
садра зун вац1ал фена, чуьхвена хквен, ахпа
чна сутьгьбетар ийида.
 Ам фена вац1ун са дегьне алай чкадал ацукьна.
Жанвурди "экъеч1" лагьайла, ада жаваб тагуз,
"фуф-ф-ф-ф" ийиз кьуд патаз яд чк1уриз хьана.
Жанавурдиз мадни гзаф хъел атана, лап хуьруьн
мукьув фена. Идал гьалтна хуьруьн чавуш Бала.
 Ида Баладиз лагьана:
- Я стха Бала, вун гьамиша и жемятдин арада
аваз инжиклу хьанва, якъин абури гьарай-эверди
ви япар денг авунва; са т1имил дарихмиш яз
аквазва заз вун. Ша, са гъвеч1и чун инсанар авачир
хелвет дерейриз, къацу векьни хъипи цуьк авай
яйлахриз, дигай кькьан дагълариз фин, заз чида,
гьана ви рик1 ачух жедайди.
- Хъсан я ман, килигда чун,- лагьана Балади.
- За жемятдиз "пака вац1аллай муьгъ туьк1уьриз экъеч1"
лагьана эверна к1анзава, исятда за фена эверна хкведа,
ахпа чу кьведни фида.
 Балади хъфена жемятдиз"жанавур ава, гьа!.." лагьана
эверна. Жемятар паяяр, лашар, турвакьар, вагьрамар
гваз атана, жанавур гатана-гатана кьена.

    ( Кьасум-хуьруьн средний школадин 5 лугьур классдин
 ученик Пирмегьемедов Рафизавай Гаджиев Агъалара
кхьейди я. Ноябрь -1940 йис).