54. Жанавурни ц1егь

Са къуз жанавур, гишин хьана, к1амай агъуз
къвезвайла, идаз яд хъвазвай са ц1егь акуна.
Ида и ц1егьрез лагьана:
- Я ц1егь, ша вун аллагьдиз килиг, на яд
рагъул мийир.
- Я жанавур, эхир винихъ галайди вун хьайила,
за гьик1а яд рагъул ийида?
- Ваъ, на яд рагъул авунва, вак тахсир ква.
- Валлагь, жанавур халу, за яд рагъул
авурди туш.
_ Гьиллеяр ийимир, гьик1 хьайит1ани, я вуна,
я ви мирес-вирисрикай сада яд рагъул авунва.
Вун ви жазадихъ агакьрун лазим я.
- Я, ччан жанавур, ша ваз зи балайрин
хьайит1ани язух ша...
- Бес я, гьаясуз, за вахъ галаз яргъияр
ийизвайди туш,- лагьана, жанавурди и ц1егь,
гьарай физ-физ т1уьна.
   И ц1егьрехъ сад эркек, сад диши - кьве
бала аваз хьана. Нянихъ диде тахтана акурла,
пака къуз ибур "диде гьик1 хьанат1а" лугьуз
ахтармишиз фена. Дагълара, чуьллера къекъвена,
эхир ибруз са к1амай чпин дидедин кьил жагъана.
Ибру идан кьилиз, крчариз мез гуз, чпин
шел-хвал авуна. Клигайт1а, - идан вилерай
жанавурдин шикил аквазва. Гьанлай ибруз чир
хьана, чпин диде жанавурди т1уьрди.
Ибру и шикилдиз тамашна, им гьи жанавур ят1а
хъсандиз рик1ел хвена.
  Са кьадар вахтар арадай фейила, ибур ч1ехи хьана,
Ибрукай ц1егьни кьун хьана. И кьун гзаф къуватлу,
хци крчар алай сад хьана.  Къаркай са къуз ибур
хперик кваз дагълара авай. Ччилин циф авай.
И кьунни хперин к1венк1ве авай. Им клигайт1а,
гьа и вичин диде т1уьр жанавур яваш-яваш,
векь квай са тик ягъвай виниз къвезва.
Имни кьуьзуь хьана тамам бейгьал хьанвай.
Кьун, кьве к1вач ччиле ак1урна, мягькемдиз
 им гуьзетиз акъвазна. Жанавурдиз атана
идан кьил кьаз к1ан хьайила, ида эцяна крчар
ам гьа тик ягъвай агъуз авадарна. Жанавур,
 инал алукьиз-анал алукьиз, та агъа камуз
кьван аватна кьена.

(Ахцагь райондин Хикемви, 42 йиса авай, к1ел-кхьин
 тийижир Магьмудов Загьиравай Гаджиев Агъалара
кхьейди я).