52. К1ири бубадиз

Гьадан тереф хуьзвайбуру
туьк1уьрнавайбур.

Бубад чай хъвай истиканда
Лимундик кваз байгьуш ава.
Буба вак хьай к1ут1улжуваз,
Гваз катайт1а, пуд руш ава.

Шапериди лугьуда-лда,
Вичи Буба ханач лугьуз.
К1ири Бубад лугьуда-лда,
Вич дуьнедал хьанач лугьуз.

Буба (а)кьахай явшандин ттар
К1ут1уларин къаншарда тур.
Квез минет хьуй, ччан жегьилар,
Буба деред кафанда ттур.

К1ири Бубад чамаданда
Яхц1ур п1ат1румд пас кьунава.
К1ири Буба кьена лугьуз,
К1ут1улари яс кьунава.

К1ири Бубад гъилевайбур
Юкьвалай хай патрумдашар.
Буба яна рекьидайла,
Гьиниз фенай бес юлдашар?

Рухунжуван к1валин ччилик
Эк1янавай рангадин лит.
Кьасум-хуьрел арза гайт1а,
Ахквадач жал Бубад мийит.

Буба, хьана вун бейхабар,
Кавха хьана рекьин чапар.
Куь вири кьий Бубад дустар,
Квез садазни хьанчни хабар?

Кьакьан синел шагьвар алаз
На шагьвардал яна уба.
Игидвилел къекъвена вун,
Япалухди кьейи Буба.

Берденкади къати ванда,
Хурудавай лацу манат.
Заз валайни гьайиф хьана,
Кандуда кьей язух Тават.

К1ири Бубад патрумдашар
Чамаданда баят хьана;
К1ири Буба кьена лугьуз,
Дидедин рик1 ават хьана.

Ви к1вачик квай дуьгуьр шалар,
Къуьневайбур патрумдашар;
Яна кьейи К1ири Буба,
Гьабур тирни ви юлдашар!

К1ири бубад чамаданда
Вили ччарар амач-луда.
К1ири Буба рекьидайла
Эбила вич авач-луда.

Буба цукьай кьакьан рагар,
Машинар квай вили айван.
Пекдин курквач1 туьтуьна-ваз,
Гьинз фенат1а Бубад балк1ан?