Кьет1ен фикир, кьет1ен бажарагъ себеб,
Кьилиз тухун дугъриданни герек я.
Акунай заз дугъри рик1ин ягь, эдеб -
Гьар келима яб акализ гуьрчек я!
Бахчадавай хушбахтвилин, ахлакьдин,
Икрамзава, стха, за ви гьайбатдиз.
Садазни нуш тахьурай кар, шандакьдин -
Ялтахвалун зигьин тахьай къуватдиз.
Виридаз хьиз вазни паяр пайнавай,
Амма ви руьгь са аршинин кьакьан я.
Акурлахъ са бегьемсузди, вайнавай,
Тикрардай на:-Хатур хамир, инсан я!
Зайиф беден муьт1уьгъ тахьун бала я,
Амма вунни муьт1уьгъначир азарди.
Ваз авайди тарифни баркалла я:
Мягьтелзава зун бахтунин уст1арди!
Фагьумсузди гъавурда кьун четин я,
Руфунилай гъил элягъиз къекъвезвай.
Къе, стха, вун жаннатда архайин я,
Ви экуь нур чи кьилерал элкъвезва!
Магомед Мирзоев. Жамилаз
© Copyright: Магомед Мирзоев Мирзой, 2024
Свидетельство о публикации №124090106673
Свидетельство о публикации №124090106673
Рецензии