51. рабочий ччар

Хабар кьурт1а зи гьалдикай:
Зи рик1 пара дар я хьи, дуст.
Айиб мийир ин ч1аларуз,
Зулуматдин къар я хьи, дуст.

Хуп1 пис яни ин къариблух!
Къваздач гъиле къачур дунлух,
Ярар-дустар хьайла кьулухъ,
Ажеб четин кар я хьи, дуст!

Ин Баку чаз са шегьер я:
Недай, хъвадайди зегьер я,
Хкверди вучтин кьагьар* я,
Лугьуз агьузар я хьи, дуст.

Ин Бакудин ч1ехи мядан:
Кьуд пад буругъ, юкь я майдан,
Ин Баку чаз хьана зиндан*,
Ватандих ялвар я хьи, дуст.

Авадан хьуй Куьрен(и) Къуба,
Мегьаларни ава зурба,
За Бакудай ида туба,
Дакьалт1дай вахтар* я хьи, дуст!

Гафар ава мад лугьудай,
Душманариз эсер гудай,
Ччар кхьена за рахкудай-
Им са маса кар я хьи, дуст.

ЧЧар гъайла килигиз кимик,
Ярар-дустар к1ват1на гьаник,
Гъил кутуна ченед к1еник,
Лугьудай гафар я хьи, дуст.

Гъурбат жедач завай эхи:
Ч1улав ч1арар хьана рехи,
Яш т1имил яз, уьмуьр ч1ехи,-
Саилдин гьалар я хьи, дуст.


* "Рабочийдин чар" ччара-ччара бендеркай ибарат туш,
им сагъ са шиир я. И шиир амай халкьдин манияр хьиз,
вичин автор малум тушиз халкьдин сиве гьатна хьана.
Амма гьакъикъатда и шиирдин автор Ахцагь Гьажи хьунухь
чаз малум я. И ч1ала а заманда Бакудин рабочийрин гьал,
дуланажагъ гзаф пис тирди къалурзаваз рабочийрин чпин
рик1е авай дердер ина ачухиз лагьанвайвиляй, им
халкьдин сиве гьатна фольклордин материалдиз дуьнмиш
хьана. Гьаниз килигна чна и шиир ктабда гузва.
*Кьагьар-кьагьур - туьтуьна шел ак1ун.
*Зиндан - дустагъхана.
*Дакьалт1дай вахтар - яни к1валахдин вахтар
дакьалт1дай кьадар яргъи тир.