50. Бакудиз къаргъишар

Яд бадида алцифнава,
Алцифнава, гъери лугьуз.
Яр Бакуда илифнава-
Вичин ч1ур хьай ери лугьуз.

Бакуд кьулал къвазди фена,
Акван чна ярдин гьунар;
Юкь аватрай Бакуд патан,
Нафт1ад кана ярдин ччинар.

Бакуд кьулал буругъ ягъай
Мирзеёвдин к1вал кесиб хьуй.
И хабарар ван дахьайт1а,
Ваз Бакуда сур несиб хьуй.

Гьуьлелай-т1уз фидай гими
Хузайиндин мал авайд я.
Ярдиз рухсат тагай Баку,
Ярдиз ялгъуз к1вал авайд я.

Ви буругъдиз къван акъатуй,
Гьуьлдан палта элкъведайвал!
Ярдин рик1ел чун акьалтуй,
Буругъ туна хкведайвал.

Къир тапусда, яр Бакуда,
Къир алук1дай югъ акунач;
Ц1ай аватрай а Бакудиз,
Чи къелемаз к1вал акунач.

"Баку ч1ур хьуй" лугьудайбур,
Гила Баку ч1ур хьанава;
Буругъарин ц1ай акурла,
Ярдин зигьин кур хьанава.

Московдихъай атай машин
Бакудихъди уьтмиш хьуй ман.
Залзалаяр гзаф хьана,
Баку шегьер батмиш хьуй ман!

Кьулан вац1уз сел атана, -
Зар машинар тухванайт1а!
Са куьнихъни вил галачир,
Баку шегьер, вун канайт1а!