Николай есаулов сан ваша вийна

Ахьмад-Хьажа! Сан ваша! Хьо вийна!
Къам цхьаъ дацарх, ву вайша ши ваша!
Сан сих, дагах герзо цаца бина,
Ломахь цхьаьна Iуьллу вийна вайша!

КIелхиъначун, мел аьлча, кадолу,
Бехке ду тхо хиллачунна, сонта.
Байтамалах топ кхиац ма олу;
Кхии кIиллой тешнабехке кховда.

Ахь машаран терзан тIе са тосуш,
Беркате нах хьайца гоне боьхуш,
Йукъара дов дерзо дарба лоьхуш,
Тхо ца хили хьайчух дегнаш догуш.

Хиларна хьо Iелам, муъмин нохчо,
Нохчийн мохк, къам хьуна чIогIа дезна…
Хьайн къам санна, оьрсий гарна холчохь,
Хии хьуна адамашца ваза.

Ахьмад-Хьажа! ЛадогIахьа соьга,
Хьо тхан даг чохь кхин дIа ваха висна,
Дика къардеш, зулам цкъа ца тоьлла,
Хьо-м и хууш жимчохь дуьйна кхиъна.

ТIамца йоцчу маршоне хьан кхийдар,
Лардеш муьтIахь кIентий хир бу даим,
Нохчийн махкахь кхуллуш ирсе дахар,
Нана-Даймохк – Россин синтемана!

Тешалахь, сан ваша, Ахьмад-Хьажа,
Хьан мостагI ву суна луьра мостагI!
Шеко йац, вай, чIагIлуш йукъахь Машар, –
Дехарг хиларх, муьйлуш ирсан хьоста!

Доза доцуш догцIена, комаьрша
Хилла Ахьмад-Хьажа дашна доцуш,
Син шовкъан суй даим халкъах хьерчаш,
Президент, хьо хила хиндерг хьоьхуш.

Хьо-м кIант варий Керлачу Кавказан,
Нана-Россин йоккха дегайовхо,
БIаьхо тешам гайтинчу «спецназан»,
Йукъйихкина шайтIанийн бIо бохо.

Нохчийн мохк, хьан чевнийн даI ду лешаш,
Муо хьовзале дардарна йух-йуха:
Iийдало и барна Iедалх тешам –
Думехь берш цакъастарна аьшпеха.

Пуьтийн кIуьрлахь сийса телевизорш,
Телемаймалш хьалха хийца а луш,
Догдохаран туьтмIаьжгаш тIеийзош, –
Ткъа йаххьаш тIехь хазхетар ду ловзуш.

Нохчийчоьнна луьйш ву массо аьшне,
И Россин цхьа лозу меже йоцчух,
Кхузахь низам бIешерашкахь ваьшта,
Ойла ца йеш, хIоттош хилла нуьцкъах.

Ойла йан-м ду оьшуш хьекъал, собар,
Хьекъал эшац, хилча алссам гIора,
Кхетам артло – хилча тIамна сутар,
Пачхьалкх йохош, дийби элийн ковра.

Сов катоха кхиънарш хIордал дехьа,
Важберш кхузахь коьрта хьаьвдехь бежа,
Демократех, либералех терса.
Белхан стаге дIахьовса ца беша.

Церан хьекъалш хьовзац маслаIате,
Ткъа Iамийна гайта мекар «понташ» –
Низам дечух, Нохчийчохь халкъ аьтта,
Ахча хьулди, кхайкхош «йар ремонташ»!!!

Ахьмад-Хьажа! Сан ваша! Хьо вийна!
Къам цхьаъ дацахь, ву вайша ши ваша!
Сан сих, дагах герзо цаца бина,
Ломахь вийна Iуьллу цхьаьна вайша!

Нах, шу тешош, ас доггаха чIагIдо,
Ахьмад-Хьажин цIий цаIанар эрна,
КIеззиг Iийча, йекхаш маьлхан агIо,
Зуламхой берш гучубевр бу вайна.

Цу йоькхане ду вай дерш сатесна:
Олхазарш, хьун, лаьмнаш, аренаш, –
Жаннатан беш кхиъна, гIайгIа йедда,
Кху махках хьарма хир йу зарзарийн.

Буьтур бац вай Нохчийчу кхин бала,
БIешерийн чIир гечйеш, бийр бу Машар.
Йуьтур йац хьагI вовшен мостагI лара,
Шу къевсина вовшашка хьежа кIоршам.

И дешнаш шен барта ала кхиъле,
Дан лерина дикнаш йукъахдуьсуш,
Вирзи Ахьмад-Хьажа Делан кхоьэле,
Машар ларбан вайна весет дуьтуш.