***

Шортта бара къомо лайна бала:
Мацаллица, цомгаш идош некъаш,
Дегайовхо йоцуш кIеззиг ханна,
Тутмакхаллехь дойуш, къиза хьийзош;

«Фильтрацешкахь», бехк ца къестош, хьийна,
Вовшахдоьхкий, тратилаца этIош,
ЦIергахь доттуш, догIмех кIожам бина,
Дорцан арахь бежнех руьйта хIиттош;

Са чохь биснарш, дегIан дола доцуш,
Нехаш санна, кхийси пана варша,
Акхароша хийла декъий даьжна,
Ца йуьсуш цхьа меже йилла коша.

Амма Нохчийн къам ца дуьйжи гора,
Хьоьжуш хьекъал долу баьчча варе,
Цу нийатца вара доIехь хIора –
Деле кхойкхуш, доьхуш байбар бала.

Вайн доIанийн лазам Деле кхочий –
Ахьмад-Хьажа волу вайна хьалха,
Куьйгаллин урх цо шена тIелоций,
Йала йулу Нохчийчоь самалха.

Ца хьажий цо доьзал кхечу махка,
Мухле Рамзан тойсу тIеман куьрка,
Хууш цо ша йуьхьIаьржа хIоттор воций,
Йахь ца йала, и воьр вуй берзан Iуьрга.

Накъосташа Рамзан ларарх тешна –
Муьлхха омра кхочушдеш уьш зиэрна,
Цундела тIеман кIуьрлахь зIенехь дека
Церан аьзнаш, вовшийн лоьхуш денна.

«Дустум», «Джихад», «Комбат», «Гипард», «Ваша»,
«Ноль-Хьалхара», вайгахь хир бу толам!
Дуьненна а гайти кIанта тешам,
Ирсе новкъа хьовзош нохчийн кхоллам.

Зуламхой цо кIажа, готте хьовзий,
ЦIий хьаьрчинчех луьра бекхам оьцуш,
Байш хьаьстина, бераш деша ховший,
Маьрша дахар хIоттош орам хеца.

Iехабелларш маслаIате боьхуш,
МостагIашна кхерам даг чохь латтош,
Лийли Ахьмад-Хьажа машар лоьхуш,
Нохчийчоьнан Сий йухаметта хIоттош.

Делах бен ца кхоьрура Ахьмад-Хьажа,
Цуьнан киэлах цхьа ца ваьллий хууш,–
И ца хилла тIера тешха хьежа,
Халкъ тIамера доккхуш, ларлуш лела.

Цуьнан нигташ Дала кхочуш дина, –
Уьш дозалла ду массарна гергахь,
Бакъду, иблис тешнабехк бан кхиъна,
ДIавиги и Дала  шена  герга.

Тешнабехко Толаман Де кхолий,
Къам лазаме, некхе куьг хьош, ластий.
Цу кхалхаро вай кхин тIеттIа гулди,
МостагI иэшо йихкина йаккъаш къевли.

Делан йолах тхан хастамаш оьйла,
Ахьмад-Хьажа, динчу диканашна:
ВоI витарна когаметта кхиъна,
Хьайн тешаме накъосташца цхьаьна.

Тхо кхеторна маршо тIамца лехар –
Хиларх гIийла Даймохк чIана баккхар,
Доьналлин дай герзе хIаллакбайтар,
Иблисан бIо стамбеш, Iехадайтар.

Хастам хьуна, весет ахь дитарна:
Экам Даймохк, безаш, ларбан тIамах,
Динехь нислуш, дешар тIедилларна,
Дайн оьздалла гойтуш денна тхайга