27. Буба кьейила руша

Чи акъун* хкатиз къав азахда,
Кирпич къакъатиз цал азахда.
Парудин пад галатай,
К1еледин* к1ук1 алатай,
Малдин мелик*
Мулкунин шерик.
Ччан буба рушан,
Къизилдин дестек буба рушан!
Гила ви к1вале вуж хьуй,
Гила ви сура вуж хьуй?
Чун туна вун гьиниз физва?
Гила, буба, чун ни хуьда,
Чун фу гвайдан гъилиз килигдани,
Хун алайдан хуруз килигдани?
Руквадлай куьлуь жеди чун,
Самунлай кьезил жеди чун,
Ччан буба рушан!
(Дидедиз) - Я диде, рушан.
Камардин юкь епининди хьайт1а гьик1ди,
Келегъандин кьил кьаркьунди* хьайт1а гьик1ди?
Я диде рушан,
Балаяр вал элкъвез,
Вун балайрал элкъвез,
Абруз бубад гайи фу к1ан хьайт1а гьик1ди?
Къаюмди балайрин гъил кьурла,
Абру ви цен кьурт1а гьик1ди?
Мих галаз перде акъудайт1а гьик1ди,
Руг галаз хайма* акъудайт1а гьик1ди?
Я диде рушан!
(Бубадиз)
-Мал к1ан хьайдаз мал хьайи,
К1вал к1ан хьайдаз к1вал хьайи,
Харманда йирф амай,
Рат1ра юг амай,
Цанал яцар аламай
Буба рушан!

(Агъа-Арагъ, Айна Ших Агьмедова. Ноябрь-1940 йис.
Къейд: мехъерин манияр ва ясдин лугьунар
Гаджиев Агъалара кхьейбур я).

*Акъун-къерехдал.
*К1еле-къеле.
*Мелик-инал иеси.
*Кьаркь-кьваркь-куьгьне ппекк, хъурхъ.
*Хайма-кьелеч1 рух.