Iаламан шун баллада

               
ГIа-буц хоьцуш, кхела дуьне,
Боккхий Iаьнан мотт.
Iалам кхойкху вайга шуьне,
Бохуш ненан барт.

Ма Iе, доттагI, йохкуш кханеш,
Вола Даймохк ган. –
Дош ло, гойтуш «Йалсамане»,
Самукъадаккха хьан.

Йуцу гезго, дулуш хьесий,
Ижу лаца бой.
«Эла» марахь накхармозий
Девдда довлуш бов.

Стешха пхьагал, йиэхьаш тебба,
Хьийзош сема лерг,
ЧайтаI леткъаш, нанна хьаьдда
Хьонкехь диъна цкъарг.

Дан котаман тевнех ижу
Йу кечйелла зу,
БIаьргех шийла суйнаш туьйсу,
Iуьтту чехош йу.

ЦIоцкъамашна хьаькхна шекъа,
Кхаьчна жеройн иэхь,
Хьаьмцийн куьйгаш кхийда некъа,
Ца волуьйтуш тIех.

Малхехь духар даьлла беса,
Iенош стоьлийн мохь.
Кхор бу кхоссар лайна ткъесан,
Лаьтташ байна бохь.

Морзгалмоьнаша йаххьаш аьгна,
Къайлах йеш бIаьцаш,
Мангалкомарш хьастарх хьаьгна,
Хьерча когех шаьш.

Хьогме къежна кемсийн хорха,
ТеIа хьан бете.
Даахь, эккхош бIаьргийн марха,
БIараш Iена тIе.

Уьйзуш дуьхьал гIабалин тIам,
Кечлуш баста мотт,
Кхийдош нускалх дарбане стом,
Стов ду IаьIна мутт.

ТIуно худуш, дегI дазделла,
Мара хьерчош къахк,
Ломан тархах кхозаделла,
Наб йеш, техка дохк.

КIамдеш дегIан ховха дилха,
Хьокхуш кхимар-шай,
ДIаман кIорнеш йажа ихна,
Йазбеш ларца бай.

Мохо, буьхьар хIуьттуш кепехь,
ДIаьндарг хьовзайо,
Стиглахь тIомадала дагахь,
Акхтарг ийало.

Анехь даздеш дийнахь терза,
ГIаттош малхо бIо,
Хехочун пхьу даьлла карзах,
Доьхуш хьуьнхахь гIо.

Маржа, лелла кхузахь «экха»,
Доцуш кийрахь дог,
Вайн хазнешца йолуш мекха,
Боцуш шиъ бен ког.

Дийнаташна дера тебаш,
Кхехьна «барзо» йорт:
Сутар бIаьргаш цIийх ца Iебаш,
ХIоттабеш цIийн хIорд.

Берийн берашна а бита,
Иэца мехкан бол.
Ларде экха, дуогIа дитташ,
Хьаста кокан колл.

Iаламан чарх хьееш, адам,
Зенийн хьесап де.
Ма йохайе, сане хьадий,
Оьмарера зIе!