Йаздархошка

      
Ма бIаьрмециг бевлла
Йаздархой къоман,
Ца хазош хьехархойх
ПохIмаллин байташ.
Наггахьчо-м хьахадо
Бераллий, школий,
Кхолламо хаздича
Жималле кхевдаш.

ХIай, стиглан къоргене
Кхийдош дерш ойла,
Гездеш дерш вай латта
Дахаллий, пурххий!
Цу йукъахь вай нисдеш,
Халонаш йайнарш,
Бац теша шайн йолуш
Баьрчче йа духхей?!

Уьш ма бу вайх хIора
Кхиийна «шайхаш»,
Вайн аьрха амалаш
Собарца хьекхнарш.
Наб йоцуш, тем байна,
Ловш сонта весаш –
Къоналлехь къежбелла,
Тишбелла лелларш.

Хьехархой шайн боцуш
Ца кхиъна лоьраш,
Ца бевлла йаздархой
Йа говза пхьераш.
Хьомсара, «синойн дай»,
КъинтIера довла,
Парнасехь цахиларх
Шу дийца хьелаш!

Йаздархойх со вацахь,
Дош доруш, тоьгуш,
Сайн беркъа маттаца
Аса шу декъалдо, –
Сирлачу кханенга
Оьзданиг хьоьхуш,
Дигарна къона чкъор,
Дикнаш дан Iамош.
               
Сий дарехь вай эгац
Вовшашна гора,
Тамехь дац цу бахьнехь
Тешош баа дуй.
Цундела, хьехархой,
Шуьца тIекаре волуш,
Ас боккху коьртара
Шу лоруш сайн куй!