Горели

       
             
Хи санна дIахудуш денош,
Шерашка йирзи-кха хан.
Горгали бека, аз хедош,
Берзабан жималлин бал.

Цкъа лагIлуш йа хIордах гIерг1аш,
Карзахе хIунда ду дог?
Итт шеран бераллин гIенаш…
Шун доза хьаьшна бу ког.

Дахаран ирхонийн некъахь,
ХIораммо шен кхоллам хьо;
Горгали, ца хедаш, бека,
ГIиттабеш къоналлин бIо.

Тхан гIилкхаш литтина тешаш –
Хьехархой – дог эшна, го!
ХIунда ду тхан бIаьргаш лешаш,
Хьийзарах дахаран гуо?

Тахана тхо санна, кхана
Чекхдер ду кхузахь кхин чкъор…
Собарца ша кхиийнчара
Зийначух дIаделла пхьор.

Техкарах стигланийн чами,
Херцарах дуьнено ха,
Горгалис шен азца даим
Дуьгур ду жималле тхо;

Кхачор ду туьйранийн беша,
Доцуче гIайгIа йа къа, –
 Iаьржа-Хожа, наьрташ а эшош,
Толамца дерзадеш цIа.

Ткъа наггахь ойланийн панахь
Гойтур ду дахаран Iин:
Доьдучу бералло анехь
Лестадеш тхоь бишеш шен.

Хи санна дIахудуш денош,
Йеттарах замано йорт,
Йиш йац вайн! Йиш йац, варийлаш!
Горгалийн сацийта мотт!

Горгали, тхан бен-бен некъаш –
Декъалде, кховдадеш ирс…
Халонгахь дог тIома доккхуш,
Тхан иэсехь хазош хьайн йиш.
                1989 шо, Х1утосург