Зи т1алабун, Первердигар, т1имил я:
Ви регьимди сес гайиди билбил я.
Са к1ус кьван куьмек хьайит1а пис тушир,
Дуьздаказ куьтягьай кар силис тушир.
Несигьатар, туьгьметарни герек я,
Туьгьметрикай тарс къачурди зирек я.
Тикрар хьайи келимаяр бизар я,
Акьулчияр пара хьайла базар я.
Гьар са кардиз вичин кьадар герек я,
Кьадар хьайи бейтерни мад безек я.
Жавабдарвал хиве кьазвай пара я,
Нарази яз жувалай бейчара я.
Хъсан кар туш тахсир ктун чарадак:
Эвел-эхир жув ак1ида кьарада.
Ацукьнава хцивал гуз къаламдиз,
Рехъ жагъуриз эцигнавай кьадамдиз.
За кхьизвайд багьа зат1 я, махар туш,
Вилик кхьей зат1аризни ухшар туш.
Накъвар физва бязибурун вилелай:
"Чун я,-лугьуз,- вегьейди ам гъилелай!"
Хьанайт1ани фейибурни кьисасдиз,
Ухшар тир са пай кьуранвай к1арасдиз.
Кич1е тир жал ц1верек1рихъай ялавдин?
Белки рик1е авай битав къилавдин.
Ашукь саид. 5
© Copyright: Магомед Мирзоев Мирзой, 2024
Свидетельство о публикации №124082103013
Свидетельство о публикации №124082103013
Рецензии