Тешнабехк

    
               1ехийначу  наношна
Хебна йуьхь, чуэгна бIаьргаш,
Чуьра йанза къоналлин цIе,
Iасанан коьжалг тIе теIаш,
ЙогIуш хьуна, со нисло тIе.

Маржа йаI! Ног тоьхна зама,
Ахь деттарна кхоъмаза ка,
Эсаро диттан гIа санна,
Куц-сибаташ лахьий хьан дIа!

Кесира, цIарна цIе йахна.
Д1адай ирс, дохк санна йа гIан!
Безам а, чим хилла, байра,
Доьзалах да къаьстича хьан.

Хьо санна, хеназа жоьра,
Бисна бу-кха нийсарой хьан!
Шу тIамо Iамийна кхера,
Ирс дайнарш ца лаарна ган!

Ахь, хийла захалош дохош,
Везаш хьайна хаьржина – Лом, –
Доьзална ца гуш ден йовхо,
Доьза вайна, дIабоьрзу тIом!

Ши йоI, кIант кхиадеш хийла
Ахь бинера, йукъ къовлуш, шад.
Берашна деш денна «хIилла»,
Луш берашна хьайн чорпийн кад.

Къизаллин къаьхьа кад кхоччуш
Ахь мелла ца хилла берриг….
Цхьа волу кIант малар муьйлуш
Хиларо, дир-кха цамоьттург.

ТIаьххьарчу новкъа хьо йолуш,
Хьан тезет хIоьттинчу дийнахь,
Хьан «хьоме», херсеха Iуьллуш.,
Татол чохь 1ара кад буйнахь.

Дика ду, Кесира, Дала
Къинхетам беш, хьо дIайигна…
Наной, шун доьзалийн ага,
Ма хуьлда деса техкийна!
                1980  шо.