ХIун аьлла дижна те кхолламан йоза?!

Дуьненан шолгIа тIом, сутара,
Ца Iебаш, саьрмаках бежаш,
Бекна сан горгали, со варна,
Дедена кхаъ бохьуш, таза.

Тарлуш ду, цунна-м со доь дийна
Латтийта тхан цIийнан эшна,
Ткъа Делан тептар тIехь хIун аьлла
Дижна те кхолламан йоза.?!

Ца хилла буьллуш со зуламна
Цхьа ког а лаьтта таханалц.
Нахаца, херх санна, со эшна,
Уьш толош, тарвала хьежна.

ЦIарах чул ларвелла рицкъанах
Дацахь ийна сан хьацарца,
Кхин дIа а сан оьмар хир йац те,
Дикнашна кхоллам дIабоьжна?!

Къоналлехь ца ларий со кара
Йаздаран говзалла йерзо:
Iедалан йамартлош, ца гучха,
Хестайан ца вуьтуш даго,

Цундела зорбане некъ боцуш,
Д1атссна сан иллин ирзо,
Заздаккхар, стом кхиар телхина,
Нош ца луш, лаьттина аьрга.

Йозанан тассамна денло со
Пхьарматхойн кхерчан йовхонехь,
Ир-кара хIиттавеш цара со
Кхачорна йаздархойн хьаьтта;

Ойланийн татолаш тхан иэрна,
Сан аз ду тахна хьасартехь, –
Вайн махкахь гIаьттинчу беркатах
Воккхавеш, аса дездетта.

Iожаллин горгали бекале,
Нагахь сан цIе йовзахь махкахь, –
Иза хьан кхиам бу, йешархо:
Ахь турмалх нисдина синса,

Схьакарош маьIнин тIум, сан байташ
Талларна массо а могIнехь,
Ца дуьтуш ас хьекхна йозанаш,
Бен доцуш чан йилла, тесна!..

Хууш ву: ца доьгIний шовдане
Кхолламан сайн хьоста дерза,
Гайна къахьегначух охккал хан
Дуьненчохь йаккха цайисар.

ХIетте, дог ца Iелуш, гуш дайлуш
Кегийрхойн Нохчоллин терза,
Йаздо ас, ца къаьсташ, сайх кхетта
Сайн мохк, къам дезаран цамгар.
                11. 09. 2007 ш