Чубандикай кьиса. 5

Килиг гила стхаяр
Инра авай кефериз:
Сесеривди ац1ана
Дагълар гьарай-эверин.

Гьик1 ят1ани, синелай
Пара зурба, ц1ай хьана,
Жанавурди ялзавай.
Мадни зай гьарай фена.

Кук1варда киц1 вагьшиди,
Куьгьне-кт1ай пек хьтин,
Саламатдиз амукьдай,
Хьаначирт1а шек хьтин.

Акъатна лап зегьледай,
Зани цавай ялзавай:
Чан гузавай киц1 патал,
Жува жуваз т1алзавай.

Аткана зун гъавурда,
Акурлай суй вагьшидин:
Чуьнуьх хьана валара,
Ракъурнавай дишиди.

Аквар гьалда, фейибур,
И саягъ гъуьрч авуна,
Жанавурди амалдар
Кук1варна, пуч авуна.

Агалкь тийиз акурлай,
Жанавурдин келле за
Лишан кьуна, гьасятда
Ахъайна кьве гуьлле за.

Ц1угъ акъатна вагьшидай,
Виняй агъуз, къван хьтин
Элкъвез-элкъвез аватна,
Къванни ваъ, къазан хьтин.

Са т1имил вахт алатна,
Дагъди хурар лал хьана.
Фикирдачир  садани:
"Ина къал-макъал хьана?"

Агакьайла патавди,
Экуьналди зайиф тир,
Заз акурди бес хьана;
Амукьна зун гьайиф физ.

Пад акъатай ч1урарал
Алайд ивид гелер тир,
Акурда гил лугьудай:
"Ин авайд вуч эвер тир?"

Нефес къачуз четиндиз
Акъвазнавай киц1ерни,
Ярудаказ аквазвай
Чпел алай хирерни.

Пуд лагьай киц1 авачир,
Эвериз зун къекъвена,
Гахкьун тийиз акурлай,
Кьулухъди чун элхкъвена.

"Муькуьбрун хьиз,-фикирна,
-Киц1ин к1валах куьтягь я.
Вичи вичиз жазана,
Бат1улдини темягь я".

Алатна са шумуд югъ,
Пайда хьана леш хьтин
Килигзава яргъалай,
Сив авуна гьеш хьтин.