Азаллехь дайн оьзда г1иллакхех боьзна,
БIешерийн дорцаша хьулдарах йоза,
Схьабеъна Нохчийн мотт – вайн халкъан хазна,
Пачхьалкхан мотт хилий, бахалахь гIоза!
Нохчийчохь гIуллакхийн хьашташка берзий,
Урамийн, майданийн цIерашца къага;
Дешаран наналла хьайна тIелаций,
Хилалахь вайн къоман Iилманан ага!
Бахалахь, Ненан мотт, абаден абдаллалц.
Аьтто беш дахаран къайленаш йаста,
Бекалахь, тIаьхьенийн дагчу Йахь хаъалц,
Дуьненчохь малх мел бу, дIабузуш гIатта!
Тоьар ду, Нохчийн мотт, ахь лайна бала,
Хьайн махкахь, сийсазбеш, бихкина латтар.
Кхин дIа хьо бехийла – самалхадаьлла,
Х1инцалц санна вайн къоман декъалдеш дахар!
Нохчийн матте
© Copyright: Заурбек Хамерзаев, 2024
Свидетельство о публикации №124081907010
Свидетельство о публикации №124081907010
Рецензии