Сихвелла хилла со баккха

Сихвелла хилла со баккха
Дуьненчу валаран кхаж,
Биъна ас тIом хиларх накха,
Оьхуш сайн ненаца кIаж.

ТIеман кхаъ бу хийра, шийла,
Аьхка тIедуссуьйтуш Iа,
Боберийн дегнаш чу чилла
Хьовзайеш, малх лачкъош дIа.

Тракторан хьакхарех ийна,
Чан – кегийн хIуьрлахь сан да
Сецира кIен арахь гIийла…
Буьртигах доьлхура кха.

Къизаллин Iаьржа ун даржош,
Гитлера болабарх тIом,
Дуьненчу безамца маршо
Кхайкхайеш веънера со-м.

Ца тоьъна сан аьрга хьекъал
Дехка цу заманахь гай, –
Сох дина тIех деза хIайкал,
Нана, ахь баланаш лай.

Дийкира, садаржар кхайкхош,
БоргIалийн зевне аз Iай.
Бажа санна, кертара лоьхкуш,
Шайн кхерчах бехира дай.

Сов хьажош, вагонийн кепа
Нисбира, тIелаьцна герз.
Аьчкан некъ белхабеш къепал
Йахара, тIедетташ дарц.

Йуккъерчу Азин аренга
Доссийра, сийсаздеш, къам.
Бехачу некъан халонгахь
Ган боцуш каш–лахьтин там.

Сталинна, гойтуш шен ларам,
Берийс хьош дилха чохь шун,
Тутмакхийн цIийх бина берам
ДIахIоттош, сурт хуьтту суна:
Ижуна тебна борз санна,
Дажало ког боккхуш байн,
Кхехкийна и адмаш шенна,
Дууш гора ¬- ца дузуш гай.

Пхьор диъча, карзаха волий,
Хьаькамаш чехабеш цо,
Эххара набахте лохкий,
Хьадалчийн гулбеш кхин гуо.

Пхьидан йиш зарзарчух къасто
Бераллехь со кхиъна вац;
Меца шад кийрара баста,
Йиъна ас уьшалан шач.

Мила ву кхиэл йинарг буьрса,
Воцуш со кхаьчна ши шо,
Чиллан бетта 23- г1а буса,
Винариг сох талорхо?!

Иэсан хьагI йац дагах ийна,
Дохорна адмаллин парз...
Лиьнера кхелхинчу дийнахь
Нрхчийнчохь ган кошан барз.

Мегар дац сов бага хьоьжуш,
Баьччанех т1ехвазван цхьаъ,
Цо некъ бахь къоман сий хьоьшуш,
И ннсван карор бац ннцкъ!

Гитлера, Iаьржа ун даржош,
Латабарх дуьненах тIом,
Дахарехь безамца машар
Кхайкхабеш веънера со-м.