Чубандин кьиса 3

Са афте ик1 алатна,
Харар хьана вилеркай,
Тефин патал ахвариз
Геширзавай гъетеркай.

Гагь цифери чуьнуьхиз
Вацран эквер мич1завай,
Гьа и жуьре йифериз
Зазни пара кич1завай:

Белки вилиз такуна
Йифен мич1и геренда,
Мадни са киц1 аткида
Жанавурдин кеменда.

Ахлат хьана хъфейла
Ч1улав цифер винелай,
Кьве хат нур гуз акуна
Заз, мукьув гвай синелай.

Жанавурдин тула са,
Вилерив ц1арц1ар ийиз,
Килигзавай ашер хьиз,
Тумни гьак1 юзар ийиз.

Са акьван заз акунай
Гьар жуьредин к1валахар,
Амма ихьтин акур туш
Жанавурар алчахар.

Инсандин я фикирдиз
Текъведай им кар хьана:
Жедай крар туш эхир
Гьайван ик1 мурдар хьана. 

Са киц1 текдиз ацукьна,
Килигзавай хаиндин
Нур гузавай вилериз,
Янавай хьиз батинди.

Муькуь пата ятахдин,
Киц1ер зи архайин тир:
Са ван-сесни авачир,
Дуьньяни гьак1 секин тир.

Къай физавай патахъай,
Ягьсуз гьайван атанвай:
Гьавиляй ни-ял текъвез,
Киц1ер т1улал ксанвай