IV. ясдин лугьунар ишелар

Кьейидан кьилихъ шехьдайла, виликди и
жуьреба-жуьре ч1алар лугьудай.Гаь-гагь
бязи чкайра гьахьтин ишелин ч1алар лугьудай
хъсан уст1ар папар жедай; гьабру ч1алар
лугьуз амайбуру "вай-й-й" ийиз, вири шехьдай.
Бязи папариз ишел татайла, а лугьунарзавай
папа гьабрун кьейибурун т1варар кьадай,
ахпа гьабурни шехьдай.
 И ч1алар кьенвай касдин яшдиз, кеспидиз,
ч1алар лугьузвайдахъ галаз адан мукьвавилиз
ва ихьтин маса гьалариз килигна
жуьреба-жуьребур жедай.

18. ЖЕГЬИЛ КЬЕЙИЛА.

Къармукьда тилер авай
Чухвада хулер авай;
Япунжидал чиг аламай,
Дегьне кьенердал гьякь аламай
Хва вай, дидедин!..

Къекъведайла ччил зурзурдай,
Акьахайла шив къугъурдай;
Хунчада тике амай,
Жергеда чка амай
Хва вай, дидедин!..

Рехъ галачир хуьруьз физвай,
Рак1ар квачир к1вализ физвай,
Зирземида гьатзавай ,
Беркъубудиз аватзавай
Хва вай, дидедин!..

Къубад* сиве хъвер авай,
Къашкъа пеле рагъ авай,
Расай тав мич1и сур хьай,
Гъидай свас вили къван хьай ,
Хва вай, дидедин!..

Гила дидеди ваз гьик1 лугьу-дат1а-ку:

-Вун хьтин жигьилар гъана мад ава,
Вавай хабар кьурт1а-
Игисна циф ава
Илигна хумул къвазва-
Лагь, ччан дидедин!..
Я зун касдизни акунач,
Я зазни кас акунач
Лагь, ччан дидедин!..
Тир-тирвал лагьана
Дуьз жаваб гайт1а*,
Абрун* девдевдин* рик1
Гьей, кук1вар жеди,
Кадрай гъилер сурун
Мурт1ара акьади;
Къудгъуна кьил сурун
Къава акьади,
Бала дидедин!..
Я хва дидедин,
Абур буш гафар я,
Бала дидедин,
Анай иниз хкведай
Касни (а)вач, дидедин!
Такурт1а гьей чпин
Вилер акъатрай,
Жагъун тавурт1а
Къуй рик1 аватрай!..

Ахпа са маса папа ик1 лугьуда.

Я бажи бажидин
На а гафар луз,
Ам рагъ гвай цлав
Ракъурзавани?
Ц1ай авай къулав
Ракъурзавани?
Аватзавайди беркъубу я,
Гьатзавайди зирземи я...

(Кьасум-хуьруьн райондин Агъа-Арагъви 60 йиса авай,
к1ел кхьин тийижир Айна Ших Агьмедовадвай кхьейди я.
Ноябрь-1940 йис).

*къуба-уймахъ, гиштан (цвалар цвадайла т1уп1ал гьалдайди)
*хумул-куьлуь марф.
Дуьз жаваб гайт1а--яни адалай виликкьена сурара
авайбуруз дуьньядал аламайбурун гьалар лагьайт1а.
*Абрун-яни сурарик квайбрун.
*Девдев-нуьк1рен т1вар я.