Чубандикай кьиса 2

Вад киц1 авай зурба тир-
Къаравулар суьруьдин.
Жунгав хьтин квахьна сад,
Хамни хъсан ц1ару тир.

Са кьадар зун къекъвена,
Тефей чка хьаначир,
Вилералди цуьк1 хьана,
Са ван-сесни амачир.

Белки текдиз ничхирди
Кук1варна ам, тахьайт1а
Хкведай хьи ятахдал,
Са к1ус нефес амайт1а.

Алатна ик1 кьве афте
Язух ч1угваз фагъирдин.
Агъзур жуьре дуьшуьшар
Атанай зи фикирдиз.

Мадни са киц1 квахьна,
Лап са цуьк1уьн т1вар хьана,
Гил зи кьарай ат1ана,
Йифизни ахвар хьанач.

Им низ акур крар я;
Рик1из лап агъур хьана.
Вуч лугьурай халкьари:
Бегьем беябур хьана.

Гьатна айиб зи чанда
Фуакайни дад тагуз,
Къекъвена зун чарх ягъиз,
Са зат1дизни яб тагуз.

Пара къекъвей к1вачерин
Язух къведа кьисметдиз...
Эхир гелер гьатна заз
Жанавуррин к1ерет1дин.

Чир хьана заз вагьшидин
Тирди ибур амалар,
Гьар жуьредин авунай
За пердеяр туп1алай.

Са фикирни келледиз
Текъвез зун тажуб хьана.
Эх авурай за гьик1а,
Жанавур гъалиб хьана?

Чара хьанач, туьк1уьрна
Беред патав са фур за.
Ацукьайла йиф-фена,
Зат1ни хьанач акур заз.