чубандикай кьиса 1

Гатун йифиз дагълара
Амукьнайла, геж хьана.
Ахладна чун ятахдал,
Далдадихъ муьгьтеж хьана.

Ц1ай хъувуна пилеркай,
Недай-хъвадай акъудна,
Япунжидал ацукьнай,
Гьарда вичиз са мурдна.

Хабаррални рик1 алай,
Аста-аста чубанди
Ахъайзавай кьисаяр,
Векьер вегьиз чайдандиз...

Кьил хкажна, дамах гваз,
Асландиз ухшар авай,
Патал алай тарта са,
Вад йисан яшар авай.

Кьве кьадамдин мензилда,
Сад хьтин рангар алай,
Ацукьнавай мад са киц1,
Илисай япар алай,

Ц1ар-ц1ар ийиз вилери,
Чеб авайди чир ийиз.
Пара зубаз аквадай,
Бедендиз таъсир ийиз.

"Эхир пучда киц1ери
Рекьел гьалтай душмандин!"
Кьилиз атай фикирар,
Кьат1ана хьиз мугьмандин:

- Килиг ат1а шемп1идиз,
Ацукьнавай пашмандиз.
Са афте тир квахьна,-
Ахъайзава чубанди.

-Пайда хьана нисинлай,
Патаривни хквезмач.
Шавла хьайи верч хьтин,
Тум илисна къекъвезва.

Вичиз вичин тандихъай
Ни атанва ягьсуздиз.
Килигзава яргъалай
Регъуьдаказ, кефсуздиз.