5. мурсал хандиз

Авайвилиз хьурай лянет, кур байкъуш,
Ви а мурдар суфат низ хьуй бес къе хуш?
Гъилер, беден ивид курут*, келле буш,
Бес мус жеда са гьакь-дуван, къарагъун?

Яхул бармак чIулав рекьел пIир хьана,
Чи хуьр, уба вирина, уф, чIур хьана.
Ругун чIугвар рат рушарин хур хьана,
Бес гьикьван хьуй и хар, тIурфан, къарагъун?!

            

Эй залум ц1ай, залай алат,
Бес я гайи, уф, хажалат!
Яхул шалдин лацу халат 
Ивида хьай гуж хьана заз.

Мурсал хан, вин ц1икьвед папан
Аялар хьуй вири патан;
Тахьуй дуьньяда гьич масан
Мешреб алай зат1, къарагуьн.

На велед яз кьунач хабар;
Ц1вена кьилел дагълар, рагар.
Кьилел атун акур хабар -
Эхир тежер гуж хьана заз.

Ужагъар вин ч1улав сарай.
Аватна са гур алпан ц1ай,
Хьурай яллагь дибдай вай-зай,
Лянетдин кьил гвай гъарагуьн.

Амач билбил, безег, сиргъа,
Вилаятда рахаз къаргъа,
Ат1уй рик1ин ивид паргъа*,
Напак беден квай къарагуьн!

Ивид вире авай гъуьлягъ,
Ат1урай ваз ин экуь рагъ,
Я эренлер, я шалбуз-дагъ,
Эхиз тежер гуж хьана заз.

Т1ебиатдин гьалал гьарам
Течир наши, я пехъи лам,
Ша майдандал хут1ун зи хам,
Девлер зулум гвай къарагуьн.

Ингье тамаш саз кьур гъилер,
Зурзазава, вучин, эллер,
Кьве виляй зи ивид селлер
Дат1ана къвер гуж хьана заз.

Я алпан ц1ай, вуч я мурад?
Бес я ваз элди авур дад!
Ви лувак ишехьда гьар сад,
Бес я зулум, дерт, къарагуьн!

Вилаят вин хьанач секин,
Гьарда ваз ийида бедкин.
Хьанач ваз дуьньяда ширин
Гьи са нямет-зат1, къарагуьн.

   (Кьурагь, Ахцагь ва Кьасум-хуьрин районрай Меджидов къияса кихьенвайди я. Виридан лугьунриз килигайла им Мурсалханди зулум авуна вилер акъудай са ашукьди лагьайди я).

*Ивид курут - ивид лахта.
*Ивид паргъа - ивид дамар.