2. Шагь элкъвей ттыл

Ахцагьрилай са т1имил яргъа са майдан ава; и майдан гзаф еке крар хьайи, куьгьне заманрилай инихъ халкьдин арада т1вар-ван авай са майдан я. Ирандин шагь Надир Самаур вац1ун дередиз атайла, вичин кьушун, туп, жебехана гваз и майдандал акъвазна. Инлай Дербентдай Ахцагьиз къведай рекьин са гзаф чкани, Самур вац1ун ва Ахцагь вац1ун кьве дере гъилин капал алайди хьиз аквада. Гьар са чка ахтармишна чирайдалай кьулухъ, залум Надир Шагьдиз вичин хъсан яракьламиш хьанвай сансуз-гьисабсуз кьушун галаз Ахцагьал ва и дереда авай хуьрерал гьужум ийиз к1ан хьана. Чпиз са еке къуват, яракь авачиз Самур вац1ун дереда яшамиш жезвай халкьдиз, Надир Шагьди хуьрер ч1ур тавун, халкьариз зиян тагун шарт1уналди, ахцагьрихъ галаз гаф сад хьана шагьдиз табий жез, и гьужумдин вилик пад кьаз к1ан хьана. Табий хьунухьин лишан яз, ибру адаз пара къиметлу цуц1улдин* хамаркай авунвай са к1урт тухвана. Иран ч1алалди и гьайвандиз (цуц1улдиз) самур лугьудай кьван. Надир Шагьди ибрувай хабар кьуна: "И гьайван гьина жедайди я?". Ибру лагьана: "Ам и чи вац1а жедайди я". И ч1авуз Надир Шагьди а вац1уз "Самур вац1" лагьана т1вар яна.
 Гьа и ч1авалай кьулухъ Ахцагьрин а майдандиз "Шагь элкъвей ттыл" ва а пата дередай къвезвай вац1уз "Самур вац1" лугьузва.
 Амма залум Надир Шагьди хаинвал авуна, ада вичин икьрар ч1урна гзаф итимар кьенай, хуьрер чук1урнай.

   (Ахцагьви Эмиров Нурмегьемедавай кхьейди я. Декабрь-1940-йис)