Вучиз гьахьнай зи уьмуьрдиз такур вун,
Заз хъуьт1уькай авунай на югъ гатун,
Фад алатна ширин легьзе акур вун,
Къаст хьанайни гафаралди зун гатун?!
Рагъ к1евирна ч1улав залан булутри,
Бейхабар акъатна бед завалдин гар,
Акатна себебсуз селдик ви паркутрин,
Вучиз къвана зал къайи марф галаз хар?..
Сифте фикир - жеда вун зи к1ани яр,
Тестикьардай на шииррин ц1арара.
Фагьумнач за : галукьда къайи хабар,
Кудайди зун муьгьуьббатдин ц1аяра.
Гужлу ялав,галукьнамаз са шагьвар,
Хкахьна хьи, гум алахьиз, руьхъ хьана.
Ч1агьнакьа на кутунай вак умудар,
Зи уьмуьрда вун Сират1ал муьгъ хьана.
Сират1ал муьгъ гапурдилай гуьт1уь я,
Ам женнетдиз, я жегьнемдиз фир муьгъ я,
Вучиз зи к1аниди вун ик1 буьркьуь я...
Шегьре рекьяй экъеч1ай ваз туьнбуьгь я...
27.07.2024.
Вун Сират1ал муьгъ хьана
© Copyright: Нажмудин Шихнабиев 2, 2024
Свидетельство о публикации №124072704414
Свидетельство о публикации №124072704414
Рецензии