Эски юйню чардахында сюеледи
Эски бешик - жетмиш жылны шагъаты.
Аны бизни аппабыз ишлегенди
Къыргъыз элде. Тюп эди аны аты.
Алашачыкъ, шёндюгюлеге ушамай,
Омакъ тюйюл, жокъ аны накъышлары.
Эхчеп анам, бирде кече жукъламай,
Алай ёте жазлары эм къышлары.
Бу бешикде алты сабий ёсдюргенди,
Юч уллусу туууп кёчгюнчюлюкде,
Сора ата журтха къайтып келгенди
Юйюрю бла жашаргъа Герпегежде.
Бешикчикни вагоннга салып атам да,
Хапчюклени да контейнерге жюклеп,
Ууакъ сабийчикле бла анам да,
Юч айлыкъчыгъын да бешикге бёлеп.
Талай кюнню келген эдиле алай бла
Июль айда элли жетинчи жылда,
Къыш тюшгюнчю, юй ишлеп ахлула бла,
Ол юйде уа юч сабий туууп артда.
Барысын да бу бешикге бёлегенди
Халал анам, бёлляу жырларын айта,
Туудукъладан туугъанланы да кёргенди,
Бу огъурлу бешикчикге жатдыра.
Эски бешик
© Copyright: Аминат Рахаева, 2024
Свидетельство о публикации №124072104031
Свидетельство о публикации №124072104031
Рецензии