Лезгинка
Къафкъазвияр- къастарал кIеви,
Кьегьалар я,ниятар къени.
Къугъура чи дамарда иви,
Авазривди, вуна «Лезгинка»!
Чеченри ваз «Ловзар» лагьана,
Гуржийриз вун «Лекури» хьана,
Гьар миллетдиз дамахар гъана,
Авазривди, вуна «Лезгинка»!
Гьейран я вал лакар, даргияр,
Ингуш, къумук, кабардин, авар,
КIватIна санал, галкIурна халкьар,
Авазривди, вуна «Лезгинка»!
Вун авай югъ-дагъвидиз сувар,
Лекьерин кьуьл –чаз чилер-цавар!
Кутур даим жегьилрик лувар,
Авазривди, вуна «Лезгинка»!
Хъуьрез хьурай Шагьдагъдин синер,
Шад жедачни Кьуландин кьерер!
Шалбуздилай чукура цифер,
Авазривди, вуна "Лезгинка"!
© Copyright: Билал Адилов, 2024
Свидетельство о публикации №124071405406
Свидетельство о публикации №124071405406
Рецензии