Амма туудугъун бёлейди

Бир уллу къууанч, байрам да
Келгенди энди бизге:
Жангы жанчыкъ къошулгъанды
Бизни уллу юйюрге.

Кёкден жулдузчукъ тюшгенча,
Жарытды саулай юйню,
Жаны болгъан гинжичикча
Кёзчюклеринде нюрю.

Бешик къайгъыгъа киргенди
Амма сабий туугъан кюн,
Барын да тийишдиргенди -
Бешикни хар керегин.

Тёшеги, жууургъаны да
Бир бирге тап жарашып,
Тобукъ  жастыкъчыгъы да
Жассы бау бла байланып.

Жатханлай жукълап къалырча,
Сабийге хар таплыгъы,
Саны-чархы тынчайырча,
Хар затны бир хыйсабы.

Бешик сабийни юйюдю, -
Деп ышарады амма, -
Ол алай бош сёз тюйюлдю,
Аны билсин хар ана.

Бисмилляхий, - деп бёлейди
Ол бешикге туудугъун,
Кёз тиймесин деп тилейди
Дууа сёзлени окъуй.

Жукълагъанда элгенмезча,
Аны бетчигин жаба,
Чырды кёзю да тиймезча,
Салды жукъа гуржаба.

Гитче бичакъчыкъ салады
Тёшегини тюбюне.
Ол арсарсыз ийнанады
Аны сейир кючюне.

Эхчей, бёлляу жыр айтады
Балдан татлы балагъа,
Минг кере махтау салады
Бучукъну Жаратханнга!