Ашукь Саид 4

Ава уст1ар кьурушдикай къизилдай,
Ава уст1ар къизилдикай зибилдай.

За расзавайди къазма туш чк1извай,
Гьар са пип1из фикирар физ ак1извай.

Кьел кими тир ац1урайт1а ц1арарив,
Вуч лугьуда заз дустари, таяри?

Гьар са кардиз жавабдарвал хъсан я,
Тахьайт1а ам гьар камуниз зиян я.

Гьик1 кхьида ялавлу инсандикай,
Халкь паталди чан гайи асландикай?

Кьве гъед цавай килигзавай, вилер хьиз,
Дагълара къай къекъвезавай, эвер физ.

Хуьруькайни харап1а жез, п1ир хьанач,
Исятдани чаз и к1валах чир хьанач.

Чк1ай ч1авуз халкьар чпин к1валериз,
Низ къведа сес язух касдин эверин.

Кьец1 ягъирди, вилер к1евна, ц1арариз,
Буьркьуь жемир, килиг хуьруьн сурариз.

Къе-пака чун вири гьаниз илифда,
Амукьдач вахт, кьил галтадиз, гьайифдай.

Низ герек я жува жув тун кьарада?
Алахъ жемир кьац1уриз кар чарадан.

Язух я заз акур ч1авуз ахмакьар
Терг ийизвай дамах, ийиз шандакьар.

Саидан т1вар сиве кьурлай, пайдах хьиз,
Бес вучиз на тухузва вун ялтах хьиз?

Бес тушни квез акур кьвадар пердеяр?
Къалагь, гьинва зайифвалур бендеяр?

Сад я вири Аллагьдиз, са туп1ар хьиз,
Теспегьарихъ галай дигай хтар хьиз.

Азгъунвиляй вилел ч1улав шир хьана,
Вафалувал парабуруз сир хьана.

За фикирдай - яраб им вуч кар ят1а?
Белки имай йифен са ахвар ят1а?

Гъетерин экв акурлай, гьейран хьана
Килигдай зун, жизви перишан хьана.

И кардин зун гьатзава гил гъавурда,
Акъалдзава симер жуван чунгурдал.

Чк1анавай,гъетер хьтин цавариз,
Ацукьзава бейтери к1унч1 тикрариз.

Чунгурни тур! Кьилевайд са гьарай я.
Тади мийир: кимиди са кьарай я!