Адама духьал ваьннар Далла а вийзавац

Мехка гIонча - ловцанца,
къаман ваьраза - довнца.
Фаьргхой Хьамзат

Новкъостий, нешарий, вай мехка дахараш, пана мехка кхаьчараш, Дала беркат чудоассадолда шун цIагIа а, вай мехка а! Могаш боацачарна моаршал лолда! Аьттув бехачарна Дала аьттув боаккхалба! Вай мехка а шун хIаране цIагIа а рузкъан кад боасса ма лолба, денгара ди массаза да Дала буззаболба!

«Iаьдал рузкъа да оаха дуъар» яхаш, къаман хьакъа дуъаш мел багIараш Дала имане берзаболба, эзделах кхеболба, деналах боха ма болба. Бусулба сага рузкъа даъар, цун сийна тIакховдар Мухьмад-пайхмаро (;) хьарам доландаь, (маIан) иман долча сага мога даьдац, дьийхкад (Муслим, 4650).

Дала вай Iаьдалхой - къаман балохой, синошка, дегаьшка боарам боацаш халкъан Яхь чуйоассайойла!.. Дала ТIангар Аьлий оамал Iокагъеш, Сина Аьлий оамал кхейойла цар синошка! Цар шоаш чуйийна шоашта тийшаболх хьабеш ма латиий наггахьа санна уж Къамдуъаргхой наькъа гаьна ца боалий, хIана аьлча вай даьша ма аьннадий: «Во арадаьннача (коа) дика чудена моттиг яц».

Дог дизза къизал чу йола саг мара хургвац ший къаман рузкъан дуъаш, къаман яхь йоацаш, къаман во мелдар мара хьа ца деш. Шоай дегчу йоал къизал аратасса. Вай даьша яхача хьалах лорале: «БIехала дег чу дохьаж доал, къизача сага кер чу кхера боал». Дала гIо долда шоана шоай дега къизал ахка яхьийта, къаман яхь шоай синошка, дегаьшка чуйотта.

Iаьдалхошта-цIурхошта бехк тIаболаш набахта кхаьча вай Къаман Сийдола ЙоI Саутнаькъан Зарифа, вай халкъан имано, денало, хьаькъало кхебаь бола яхь йола Къонахий - Ужахнаькъан Малсаг, БIархой Ахьмад, Чемурзнаькъан Барах, Малсагнаькъан Муса, Хаутинаькъан Бахьаудин, Нальгнаькъан ИсмаIал, кхыбола тутмакхаш Дала маьрша-могаш болаш цIенах тохалба!.. Цар хьийгаь хало, царна хинна бохам, царна баьккха хьоавзам, царна хинна зе Дала маьле яьзадолда царна, Iаьдалхошта Дала къине лоархIалда из!

ВIалла шеко йоацаш, вай амин ала мара ца дезаш, Дала бекхам баргба ма бий вай халкъан рузкъа дуъаш мел багIачарна, вай къам кхестадечарна, вай лаьттах катеха мел багIачарна, вай лаьтта лора ца деш, харцонца декъаш мел лаьттачарна! Амин!..

Фаьргхой Хьамзат

Аьтинг-бетта (июнь) 5-гIа дийнахь 2022 шера