Ашукь Саид 2

Савкьат хьтин, аватай хьиз цаварай,
Зенгини зун авудзава ахварай.

Лугьузва заз: "Стха, имай Мурад я,
Гъиле къачун и кар кьилин макьсад я.

Къимет гумир къенин йикъан хийирдиз,
Дикъетдивди килиг кардин эхирдиз.

Гьакъисагъ зегьметди кьадар вине я:
Гьакъисагъ зегьмет къеледин бине я.

Саидакай жувани са ц1ар ая,
Т1вал хгана симериз фад тар ая.

Са сес мадни артух хьурай дагълара,
Сел хьиз, къати иви къекъуьй дамара!"

Чуьнгуьрди сим тардилай заз акур туш,
Къуьруьвал квай яракь халис гапур туш.

Виш йисарин пас алудун четин я,
Амма жуваз жуван миллет ширин я.

Гьуьрмет авун халкьдин сифте-эвел я,
Ахьтинбурал зун дат1ана мягьтел я.

Ялтахвалун им итимдин амал туш,
Дасмалар гвай шаирни са кьегьал туш.

Абасдихъ намус маса гуз къекъведай
Низ герек я шаир, чинар чуьхведай?

Гайидакай хийирдин са к1вал ая,
Намусдивди жуван рекьяй гьал ая.

Инхъа-анхъа, зат1 авачир къаб хьтин,
Гелкъвезва зун, гъал галачир раб хьтин.

Мурад-метлеб авачиз туш - хара я,
Эхирди ц1ар гьисс ийиз бейчара я.

Гьарда вичин тарихдал амалзава,
Чна гила абуруз амбалзава.

Руьгьдиз яхун асландихъ мешреб жедач,
Жувал дамах тавурдахъ эдеб жедач!