Ашукь Саид 1

Гьеле куьтягь тахьанамаз зегьметар,
Гьар жуьредин кьабулзава къиметар.

Ягьни намус са къамат, са ери я,
Акьул, камал дугъри халкьдин вири я.

Кьиле хьайт1а къайгъусузар, ахмакьар,
Гелевайда ийидачни шандакьар?

Зун экъеч1ай рехъ мич1и тир, четин тир,
Заз к1аниди са жизви кьван изин тир.

Къачудалди са кьадарниз атанай,
Къванер кьула, цацар кьула ак1анай.

Рахшандарни ийидайбур шад хьанай,
Амма ахпа са-сад, са-сад пад хьана.

Лугьуз хьайт1а: амач акьул келледа,
Югъди, йифди аваз хьайла тевледа,

Хабар жеда вичиз вичин гьалдикай,
Юлдаш хьана япар алай малдикай.

Изин гайи рехъ зи мадни четин я:
Виридаз хьиз чазни авайд зигьин я.

Акьул, камал жуванбурун вине кьаз,
Шарвилини Давудакай чешне кьаз.

Далу хьайла вик1егьвал мад хъсан я,
Тахьай ч1авуз амукьарди гьижран я.

Мукъаятвал са ч1авузни зиян туш,
Гьар азардиз вик1егьвални дарман туш.

Акьул бахт я вик1егьвилин, жуьретдин,
Вилер агъуз тавурай чи кьисметди.

Кар хьайила мешвераяр пара я,
Амма дуьне элкъвезавай чхра я.

Гьавай лагьай бейтерикай дад гудач,
Гъиляй вегьей булахди мад яд гудач.

Булах чешне хьайи ч1авуз къилихрин,
Фад булахдал эвер ая къанихриз.

Архайинвал хъсан зат1я кесибдиз,
Фуан кьве к1ус аватайла несибдиз.

Архайинсуз вик1егьбур чи дамах я,
Жуьрет эллер вик1егьбуруз даях я.

Агъуз жезва, акурлай гьял Саидан,
Амачир хьиз чилерихъ мад загьирар.