Адамлагъа кесин сюйдюрген

АДАМЛАГЪА КЕСИН СЮЙДЮРГЕН
 
СССР-ни спортуну устасы, миллетин сюйген къарындашыбыз
Бабаланы Къууанчха атайма.

Ахшылыкъла этгенсе жашауда,
Адамланы къайгъыларын кёре.
Таукел болуп, иги иш башлауда,
Сынмагъанса, тау болгъанда ёре.
 
Сен – миллетни кертичи уланы,
Къыйын кюнде болушдунг кёплеге.
Ачыкъ эди, халал эди жанынг,
Жыяр кибик болмайын кеплеге.
 
Миллетлеге кесинги сюйдюрдюнг,
Ыразылыкъ, махтаула да тапдынг!
Аланы намысларын да кёрдюнг,
Адамладан ыспаслыкъ да алдынг. 
 
Къонакъланы, къоншуну сыйладынг,
Айырмадынг къабарты не орус,
Тилей келген болса, къол узатдынг,
Аны тюзге санап, кёрюп дурус.
 
Жашау жолунг замансыз юзюлдю,
Ёксюз къалды юйюрюнг эм жеринг.
Сени бизден айыргъан ёлюмню
Ма бюгюн да жаулайды тау элинг. 
 
Сен кёплеге жол ачдынг жашауда,
Ырысхынгы аямай не мюлкню.
Сеничала, туралмай ташада,
Элтедиле алгъа ёмюрлюкню.
 
Атайдыла «Къууанч» деп жашлагъа,
Юйюрледе улан туугъан болса.
Ёхтемдиле таулу от жагъала,
Иги эди, умутларынг толса.
 
Болгъан эсе да ёмюрюнг къысха,
Жашап турурла ишлеринг мында.
Атынг бир заманда кирмез чарсха.
Туугъан кюнюнг боллукъ эди къышда...
 
Мадар къайда жарсыугъа, ёлюмге?
Аллахдан тилей жаннет жанынга,
Тансыкъ болуп, излейбиз кёрюрге,
Ишлерингде тураса таныла.
 
Сен – игиси бу биз туугъан жерни,
Дуниядан замансызлай кетдинг.
Унутмайын сени, Беш Тау элинг
Къыйын кюнюнде таянчакъ этди.

Байтуугъанланы Исмаил

7-чи ноябрь, 2021 ж.