Тост 6

        6

"Ахъайда - са ягълу к1ел
Хкай ч1авуз ятахдай,
Кук1варна ам хъсандиз,
Эцигна за чанахда.

К1ишниш-пириш-виришни
Серке-мерке къачуна,
Истивутар як1ук за,
Гьар жуьредин кутуна.

Вири гьазур хьайила,
К1евирна ам пекерал,
Эцигна са эхъендик,
Бустандавай векьерал".

"Т1уьн авурлай кьулухъди
Хабарар низ герек я?
Квахьна жуван к1ерецар
Хъукъудур фад, зирек яз.

Тахьайла як дулмадик
Са т1вар кьванни, дарман яз,
Мад адакай рахамир:
Имни са йикь-шуван я".

"Келемарни ругурла,
Ахлудна за къулалай,
Ахпа фена як1ар гъиз,
Серинарик салавай.

Ич1и чанах акурлай,
Зи бейнияр элкъвена,
Тадидаказ як1арихъ,
Кьуд патара къекъвена.

Амма гелни амачир-
Заз бегьем гъарик1 хьана.
Чидач им вуч кар ят1а-
Гьакъикъатда цуьк1 хьана.

Белки амни Балашан
Кац тир салаз атайди.
Гьамай тир хьи гьайванар
Чи к1валерай тухвайди.

Балаш кьена сурава,
Кац са к1ац1а чин хьана.
Хтанват1а хуьруьз чи,
Чаз бегьем четин хьана".

"Сура авай Балашни,
Санив тазвач алчахди.
Угъри як1ун гьайифиз,
Наз гузава къачахди.

Акунай заз чуьнуьхиз
Ада а к1ел рекьелай.
Чувалдаваз къгъизвай
Чинидаказ, синелай.

Акунриз са абалкьа,
Пабни галай гъвар хьтин,
Фурсар ийиз къекъведай
Чилел алк1ай тар хьтин".

"Дулмайрал зи рик1 ала,
Амма пешер дак1ан я.
Къвацаз жедай туш завай:
Чандиз бегьем зиян я.

Бахтсузвал я, югъди за
К1валах чпиз авурлай,
Гешил к1вализ хтайла,
Т1варни зи гьак1 кьац1урна.

"Къажгъанди кьат1 куьтягьна",-
Лугьуз хорди арзавай,
"Гакъадарна к1валин пад",-
Мадни гьак1 тикрарзавай.

"Ви ан вуч аззар авай?
Ахьтин к1валер гакъахьуй.
И к1валах чир хьайила,
Ваз и крар туба хьуй.

Фад ахлада камарив-
Идакай заз дуст хьана!
К1ерец яна авудур-
Им вучтин, лагь, туст хьана?

Вахт акъудиз акурлай,
Зунни фена куьмекдиз.
Са-сад, са-сад дулмаяр
Хт1уьна зирекдиз.

И кар акур Сефера
Тади ийиз эгеч1на.
Суфрадилай къарагъна,
Фад гьаятдиз эхвич1на.

Хъсан хьана Сафарчи
Гурарар гваз хтана.
Итимди хьиз лагьайвал
Абур к1вализ къгъана".