Тост 5

Хабар кьазва гил завай:
"Чидани ваз дулмаяр?
Заз акур са бязибур,
Пешер алай ярма я".

"Килиг, квахьда иштагьар-
Вилик квайди ракъирмир.
Къайибурув ац1уриз,
Руфун жуван агъурмир".

Мад фикир кьат1ана,
"Хьуй,- лугьузва Сефера,
Амма мадни эхтилат
Ийизава эзбера".

"Са сеферда къуншиди
Эверна заз, куьмекиз.
Са чай кьванни гуз хьанач,
Югъ акъуднай, хуьрекиз.

Хуьрек куьтягь хьайила,
Къецел пата мич1и тир.
Дуьз лагьайт1а, руфунин
Пад кумачир- ич1и тир.

Зарафатрив, ч1аларив,
Къуншияр за гатана.
Дарк1уц1 хьтин дулмаяр,
Эхир вилик атана.

"Ви къуншидин кьил ухуй,
Бес я авур пардаяр.
Ви виликди атанвай,
Фад къачу, неъ дулмаяр".

"Къачуна фад дулмадин,
Са-са пеш за куьткуьрна.
Къарачийрин пекер хьиз,
Са ц1уд алай, элкъуьрна.

Атай ч1авуз юкьвал кьван,
Пешерин амбар хьана.
Алагъайла мадни кьвед,
Келемрин базар хьана.

Гьа ик1 яваш-явашдиз,
Рик1ив кьвадар акъатна.
Хкажайла кьуькуьнив,
Кьве дуьгуьд твар аватна".

"Аман Аллагь, вуж ят1а
И дулмаяр авурди?
Кьве пешни лап пара тир-
Заз ама жал такурди!

Алчукарла, чарар хьиз,
Фикир, фагьум гьинавай?
Кьил хъутанва, я къунши,
Зи гьал мад четин ава.

Зегьер хьайи к1ерецар
Элкъвена гил дулмадиз.
Мумкин я са сятдилай
Элхкъведа къавурмадиз".

"Сифте сефер дулмаяр
Аквазвайд я, лагьайла,
Кеф хьана зи къуншидиз,
Ахъайна заз авайвал".