Тост 4

      4

Хтай ч1авуз гьаятдал,
Къекъвез хьана гурарихъ:
Саламатдиз эцигна,
Винел алай гъварарин.

"Яраб гурар квахьна жал,-
Хиял фена келледай,
-Гьа ви тостни галаз кьий,
Акъудзавай зегьледай".

Жува-жув нез авай зун-
Каш ганавай хеб хьтин.
Къечягьзавай ажугъди
Аял авай кьеб хьтин.

Машат авун хийир туш-
Фад гурарар ахкурай!
Зи келледа авай т1ал,
Душмандизни такурай)

Хабар кьазва дидедвай,
"Гьиниз фена гурар чи?""
"Валлагь, бала, атанвай
Агъадаллай Сафарчи.

Минетариз акъвазна,
Лагьана, фад хкида,
Сала авай к1валахар
Кьве декьикьад ийида.

Фад хкида а касди:
Хиве кьурдан иес я!
К1вализ хъша, фу-зат1 неъ,
Къекъвей кьадар къе бес я".

"Яраб мад са сятда жал?
Сивиз гьикьван къай гуда!
Хъсан тир заз къуншиди
Лагьанайт1а -"чай гуда!"

Чайдиз тустар герек туш,
Руфун цивди ац1урдай.
Са багьна кьван хьанайт1а,
Сад за идак кк1урдай.

Квахь, ахлада винелди,
Вун вучтин инсан хьана?
Мус неда на, я залум,
Бегьем заз зиян хьана.

Суфрадаллай зат1арин
Т1варар кьаз ам эгеч1на.
Акур туш заз ин саягъ,
Гафар лугьуз, кьелеч1на.

Дулма вилик атайла,
Са т1имил заз шад хьана.
Тадидаказ т1уьнайт1а-
Лап кьилин мурад хьана.

Бахтуни мад хъверна зал,
Мад зи крар пуч хьана,
Гада, гада лагьайдаз,
Гьамиш гьак1я- руш хьана".