Зайиф къуьр

Мет1ерилай виниз кьван
Жив ацукьай тамара,
Са къуьр авай, фагъир хьиз,
Чуьнуьх хьана валара.

Гатуз рагъул циф хьтин,
Хъуьт1уьз лацу чар хьтин,
Вичин рангар дегишдай,
Нурар гуз мармар хьтин.

Гьайиф ч1угваз ацукьна,
Фикирар лап агъур тир:
-Мегер сев хьиз ахвариз
Фенайт1а лап абур тир.

Гатфаралди ярх хьана,
Кьуьд акъуддай магъарда,
Кич1 авачиз беденда,
Шириндаказ ахвардай.

Рик1из чими фикирар
Атай ч1авуз нуш хьана,
Са т1имил кьван геренда
Мукъаятвал буш хьана.

Лап мукьувди атайла,
Ахпа вагьши акуна,
Вич вичелди хтайла,
Хкадарна, кхуна.

Къудгаз-къудгаз катна ам
Кьил элкъвей са патахъди,
Алцурариз катзавай,
Инихъ, анихъ, хъвалахъди.

К1ани кьвадар къудгунар
Авурт1ани, куьмек яз,
Жанавурар къуьрерлай
Пара гагьда зирек я.

Вичин ажал атайди
Чир хьайила эхирдихъ,
Хкадарна фуруз са,
Чара ат1ай фагъирди.

Нин къармахри къазурт1а,
Вучти тафават ава?
Жанавур ваъ, сев хьурай!
Хийир бажагьат ава.

Севрен винел аватай
Къуьр цавариз акъатна,
Ахпа гьайван зирекдиз,
Валарайт1уз кхатна.

Кьулухъайни жанавур,
Агъур рагун пад хьтин,
Къудгур ч1авуз к1унт1унал,
Хьана ял фей рад хьтин.

К1унт1аникай сев хьана,
Хъуьт1уьз вичин меселлай.
Темпелвиляй, яц хьтин
Пешер к1аник, къецеллай.

Агъур са зат1 алукьай,
Аватна ам ахварай.
Кич1е хьайи гьайбатда
Акъатна пис гьараяр.

Жанавурни, лагьайт1а,
Рик1 кьве патахъ ч1ук хьана,
Сад муькуьдахъ галтугиз,
Гьа иналди цуьк1 хьана.

Вилер т1ушаз п1еркьи яз
Катзава сев валарай,
Жив амай кьван тамара,
Ийиз хьана чамарар.

Къуьрни авай аслан хьиз,
Кич1евални ахлатна,
Жанавурни сев гатай
Т1варц1икайни къаматна.