Жаша, халкъым, – жигерликни юлгюсю,
Нартланы, батырланы да уясы.
Тазалыкъны, халаллыкъны кюзгюсю,
Деменгили тауларымы къаясы.
Къайсын жырлагъан Чегем тауларынгы,
Къучагъыма къысар эдим мен къаты.
Санга атайма жюрек алгъышымы,
Алай татлыды манга сени атынг.
Сюеме огъурлу адамларынгы –
Ныгъышлада олтургъан къартларынгы,
Намыс-адет да билген жашларынгы,
Бийикледе къалкъгъан тау къушларынгы.
Ёчюлмесин бир заманда от жагъанг,
Жылытханлай турсун келген къонакъны.
Ёмюрледе тюшмесин сени багъанг,
Сен – уясы ариу таулу жомакъны.
Бейтугъанланы Исмаил
Халкъым
© Copyright: Исмаил Бейтуганов, 2024
Свидетельство о публикации №124051002983
Свидетельство о публикации №124051002983
Рецензии