Тура эдим санга чексиз ышанып,
Сезимлерими да сенден жашырмай.
Жюрегим бла, жаным бла ийнанып,
Сени къатымдан узакъгъа ашырмай.
Сюймекликни жашырмадынг сен манга,
Кёрсенг, кёзлеринге келе жарыкълыкъ
Къарыу берсе да ол шартла жаныма,
Артда уа сен сынатханса сатхычлыкъ.
Сюеме деп, сюялмаймы кетдинг сен?
Мени къоюп, нек алдандынг башхагъа?
Жюрегими биргеменги элтдинг сен? –
Юйреналмай къалдым сенсиз жашаргъа.
Санга насып тилей эдим Аллахдан,
Танг атханлай, жер тургъанда уяна.
Халал болсун дедим санга Жаратхан,
Жашай эдим, санга чексиз къууана.
Сен, башхагъа кетип, кюйдюм, къаралдым.
Мени мудах этер ючюн къоймадынг.
Сени излеп, жаным алай таралды…
Жарсыйма бек, жашауунгда онгмадынг.
Мени кёрсенг, бёлюнеди акъылынг,
Кёреме мен, тураса сен мудахлай.
Айтырмыса ол тасхангы жашыртын,
Чолпугъа сёлешип, ма кюн батханлай?
Бейтугъанланы Исмаил
Алдап кетдинг
© Copyright: Исмаил Бейтуганов, 2024
Свидетельство о публикации №124051002731
Свидетельство о публикации №124051002731
Рецензии