Сюймеклигими жашырмадым

СЮЙМЕКЛИГИМИ ЖАШЫРМАДЫМ

Тазалыгъынг жюрегими бийледи,
Муратларым, умутларым да болдунг.
Жаныма ариу макъамла ийлединг,
Хур къызыны къолу кёрюндю къолунг.

Тазалыгъы таудан келген шауданны
Кёзлерингде тура эди къалтырай,
Бузлу чыранлары жууукъ тауланы
Нюр бетингде тура эди къалтырай.

Хорлай эди кечеги къарангыны
Жулдуз сюрюу. бийикледе жылтырай.
Ол узакъдан келген жулдуз жарыгъы
Бара эди ол шауданда сылжырай.

Сизге элтген жолну жарытады ай.
Тюбер кюнюмю мен энтта да сакълайма,
Ётерсе былайны деп, ийнаннганлай,
Жолгъа къарай, мен термилип жашайма.

Ышаннганлай, кёрюрме деп мен сени
Кёзлерингде халаллыкъ эм ариулукъ,
Ашыкъдырып турама кечелени,
Сени бла табарма деп зауукълукъ.

Мени кёрюп, кёзлеринги жашыра,
Сен бараса таулу элде орамда.
Мен а – тансыкъ кёзлеринге, къашынга,
Бир къойсанг а, тохтап, санга къараргъа!

Сюймекликден къошуп, жыйып таулада,
Дунияны битеу гюлюн мен санга,
Берир эдим жюрегимден саугъагъа.
Сен де дейсе, жаным, атчы бир анга.
 
Бейтугъан улу Исмаил