Ийнаныусуз къалай?

ИЙНАНЫУСУЗ КЪАЛАЙ?

Къалай жашагъын, ийнанмай адамгъа,
Ышаныусуз болуп уллу аламгъа?
Этеме тас эсни баргъан жолумда,
Къалай болгъун бу алдаулу болумда?

Тийирмедим бир адамгъа хатамы,
Аны айтып, жан уялтмаз атамы.
Кери этип дуния харамлыкъны.
Жыргъа салдым мен керти адамлыкъны.

Мадар излей бу алдаулу жашауда,
Чыгъар эдим десем, бийик ашлаугъа,
Болалмайма, баралмайма таулагъа,
Жууап этип чыгъар кибик даулагъа.

Туугъан элим, сендеди бар асыулукъ,
Баланг болса бир заманда жарсыулу,
Сен эсине киресе да олсагъат,
Эрлигине боласа тилсиз шагъат.

Туугъан элим, ахлула къабырлары,
Эрттегили таулула тыпырлары,
Жууукъсуз сиз жюрегиме, жаныма,
Къанда болгъан барып турур, таныла.

Чарсха кетип жюрегимде тургъанла.
Керти дунияда тирмен бургъанла,
Андан къарап, кёремисиз сиз бизни,
Аманыбызны эмда игибизни?

Жашау этип, мал тутаргъа кюрешип,
Ташлы жерни сабанлагъа юлешип,
Юйретгенле бизни таза ниетге,
Къалай турасыз анда, неле эте?

Иги этген къайда ахшы амандан,
Уялгъанла биз соруулу къарамдан,
Юйренирге кюрешебиз жашаугъа.
Ол а болуп къалгъанды дауур, къаугъа.

Бейтугъанланы Исмаил