***
Бир къарт таулу, бир нарт таулу,
Дуниягъа тюйюл даулу,
Айда эди бирде алай,
Баям, келлик кюннге къарай:
«Жаназыма сюелликле,
Ёлгениме кюерикле,
Манга дууа этерикле
Сау болугъуз, разыма мен,
Мени агъач атха салып,
Элтирикле, ёрге алып,
Жолда бара, арып-талып,
Сау болугъуз, разыма мен.
Мени ызымдан келликле,
Манга эслерин бёллюкле,
Жумушуму этерикле,
Сау болугъуз, разыма мен.
Арбазыма жыйыллыкъла,
Ёлгениме жилярыкъла,
Аш-таш этип, сыйларыкъла,
Сау болугъуз, разыма мен.
Ахыр жолгъа ашырлыкъла,
Аманымы жашырлыкъла,
Аууруму ташырыкъла,
Сау болугъуз, разыма мен…»
Аны эштген бир жаш адам,
«Жашау-ёлюм, – деди, – баям,
Юзюлмеген байламлыла,
Бушуулула, байрамлыла…»
Бир къарт таулу, бир нарт таулу...
© Copyright: Исмаил Бейтуганов, 2024
Свидетельство о публикации №124051002660
Свидетельство о публикации №124051002660
Рецензии