Аш т1уьрди фирай

Хьана-хьанач лагьайт1а,
Идакай мад мах жеда,
Рик1ел хтайла, бязи
Жегьилар лап къах жеда.

Гьакьинивди рахайт1а,
Вич са т1имил асил тир,
Йисар пара алатна,
Яшар хьанвай жегьил тир.

Кесибвиляй хьаначир
Са к1валахни тук1вена:
Сусан фикир рик1еваз,
Са кьадар ам къекъвена.

Цазни жагъич, акьахдай,
Бахтар квахьай береда.
Т1вар гьатнавай фагъирдин,
Абур авай дереда.

Зегьле фенай хуьрба-хуьр
Къекъведай кьван бубадин,
Чарасуз яз акъатнай
Шекидиз, мад Къубадиз...

Са шад хабар атана:
-Фад ракъура илчияр.
Тади ийиз гададиз:
-Акъуд,-лугьуз,-харчияр,

Етим са руш к1ел хьтин,
Патал алай хуьрева.
 Жегьил хьана лекь хьтин:
Факъир бегьем к1евевай...

Фад ракъурна илчияр,
Зуьрне далдам илигна.
Свас къгъана буш к1вале
Гадад патав эцигна...

Гугрум ийиз рахазвай,
Руфун кьазва кесибди.
Ц1ийи сусан патавай
Къакъудзава несибди.

Недай-хъвадай такуна
Гешил авай жегьилар.
Регъуь хьайи гададин
Аватнавай гуьгьуьлар.

Гьарда вичиз кеф ч1угваз,
Ийиз гьарай эверар,
Кьуьлерзавай шаддаказ:
Куьчедаллай мехъерар.

Язух жегьил экъеч1на
Айванд пип1е ярх хьана.
-Вагь!-гьарайна бубади,
-Им вуч къурумсах хьана.

Сусан патав ахлада,
Гьак1 мехъерар ч1ур мийир,
Гужунал паб гакьурлай,
На чун беябур мийир.

-Ваъ,-лагьана гадади,
-К1ант1а ирид хам фирай,
Гешила зун рекьизва-
Аш ни т1уьнат1, гьам фирай!