***
Кожны, хто жыве, пачуцці мае,
Адчувае цяжкасці жыцця,
Плача над сабой, і спачувае,
І знікае ў бездань небыцця,
Той паэт, бо ён сабою піша
Летапіс абставін, у якіх
У душы трывога, звонку - ціша,
І жыццё - кароткае, як міг.
Кожны, хто жыве, - паэт таксама,
Хоць не кожны можа зрыфмаваць
Той грудок, дзе спачывае мама,
З тым, дзе побач і яму ляжаць.
Хай камусьці застанецца хата,
Яблыневы сад, ці чарнавік,
Ці балючы успамін пра брата,
Ці гаючы - пра таго, хто знік.
Кожны, хто жыве, пачуцці мае
І любові пакідае след,
На зямлі кагосьці затрымае,
Хто, бясспрэчна, як і ён, паэт.
26. 03. 2024 г.
Кожны, хто жыве, пачуццi мае...
© Copyright: Юрий Боровицкий, 2024
Свидетельство о публикации №124033007240
Свидетельство о публикации №124033007240
Рецензии