Кьелеч1 жезва чи календарь,
Алукьна мад ц1аяр гваз Яр.
Яруз-яруз куз "бубуяр",
Мугьман хьанва чаз шад сувар.
Алатна фей агъзур йисар,
Рик1еллама иер йикъар,
К1ери-к1ерец къугъвадай къар,
Нянихъ к1ват1из яран паяр.
"Ну-ну" ягъиз ахъагъиз вар,
Мани ягъиз шадиз халкьар,
Гадаярни жегьил рушар,
Магьле-магьле жедай лужар.
Ц1алай ийиз хкадарунар,
Чипик кумай куз гунагьар,
Лигимариз жегьил чанар -
Иер я чи яран сувар.
Ни авурт1а хъсан са кар,
Адаз ягъиз гурлу капар,
Варцел тежез к1еви дап1ар,
Йифди шад тир жегьил дустар.
Ирид хуьрек аваз къапар,
Къуни-къуншид гатаз гурар,
Рушарини шиткиз къавар,
Иер тир чи яран сувар.
Мубаракрай яран сувар,
Куьгьнебуруз ягъиз ц1аяр,
Гьуьндуьрдиз физ ц1ун ялавар,
Т1алабиз чаз са виш йисар.
18.03.2024.
Мубаракрай яран сувар
© Copyright: Нажмудин Шихнабиев 2, 2024
Свидетельство о публикации №124031905426
Свидетельство о публикации №124031905426
Рецензии