Кьвези къари

Пара ава чи Къавкъаздин дагълара
Эвел заманадин сирер, махар хьиз.
Садбур къвезва чи япариз яргъарай,
Муькуьбурни къенин йикъан хабар хьиз...

Кьакьан синел, харап1айрин арада
Тек са к1вал я сегьялдаказ амайди.
П1исп1идин экв йифиз анай аквада:
Са къари я кьуьзуь, ана авайди.

Виш йисарив агакьнавай мукьвара,
Ц1уд йис я ам текдиз ама дагълара.
Къарид патав къвезва гьамиш мукьваяр,
Чпин патав хутахиз к1анз, яргъарай.

Ц1уд йис кьван я куьч хьана халкь шегьердиз,
Гьукуматдин кьарардалди, куьмек яз.
Хуьруьз фидай килигайла тегьердиз,
Зирекдини жедай гьасят хенек яз...

Экуьнихъди къарагъна ам куьчеда,
Йиф жедалди хва вилив хуьз ацукьдай.
Къанни ц1уд йис ава ам и жуьреда,
Гагь йифизни куьчеда ам амукьдай.

Къани ц1уд йис алатнава к1елариз
Фена гада, чанта к1улал вегьена.
Къани ц1уд йис баладин т1вар тикрариз
Къари ама хуьре, саниз техфена.

Вичизни аквазва гьамиш ахварай
Гъвеч1и бала, вилер цавун эквер хьиз.
Ихьтинбур мад пара ава дагълара:
Дагъвияр я цава авай гъетер хьиз.

Аял хайи ч1авуз са гъед куьк1уьда,
Малаикдиз ухшар авай, цаварал.
Гьавиляй чун пашман ч1авуз килигда
Йифен цавуз, ийиз минет-ялварар.

Алкьазава п1узарар мад аялдин-
Рик1из пара к1ан я мили хъуьруьнар.
Яраб гила гьина ава кьегьал зи,
Жигъин тийиз хайи к1вализ жигъирар?

Ц1ай хъийизва къулал къажгъан эцигиз;
Гьазурзава хуьрек ширин баладиз.
Йифен ч1авуз айвандилай килигиз
Тик рекьериз, ялварзава Худадиз.

П1исп1и куьк1уьрзава ада яру тир,
Рехъ жагъун патал баладив мич1ериз.
Сегьер-сегьер ацукьзава парудив,
Кьурай накъвар авадариз чилериз.