Тешам!

Хьан-хьаннах а цатешаран шиъ ду бахьана,
Хьалхара ду, стаг ванне а вевзаш цахилара,
Шолг1а бахьана а вевза-везарг ц1аьххьана,
Дикаха вовзаро дагчу тешамзалла йиллара.

Цхьаннех б1обоьлла, тешам  д1акховдийча,
Иза оьзда а хетта, цунах дика битам болуш,
Денна а буса а хила  веза, лерг-сема кийчча,
Хьан догц1еналлин дуьхал х1ун ло-те олуш.

Цхьа а шеко а йоцуш сихвелла атта тешахь,
Т1екхача мега цкъа  мацца а, шиннах цхьаъ,
Йа тешнабехк, х1илла текхош шен белшахь,
Йа хьакъ долу тешаме  доттаг1 воьлла кхаъ.

Йахь а эхь-бехк а ц1ийца долуш  стаг велахь,
Хан оьшу йуькъаметтиг нисйеш т1ай тохкуш,
Тассайелла  уьйр  лераме шарйеш ца  лелахь,
Б1аьрганег1ар тохале йогу иза к1ур боккхуш.

Тешаме верг-воцург хержа, цхьа а вац говза,
Мунепакъ а вац хьуьнаре, вуон-дика къесто,
Хьо ца лоруш юьхь йагийча хедочулла доза,
Шалхончаш беза, хьалххе хьайха д1акъесто.

Г1уллакх дац бен ца хеташ д1акхийдо тешам,
Догц1енна, ойланза массо а хиларна догдаха,
Экаме тешам байича хуьлу сатийсаман эшам,
Дог даларо халбате такхийча хала хуьлу ваха! (С) 05.02.24.