Агакьарна дидеди зал,
Хурун нек1ед галамаз дад,
Хайи халкьдин зи лезги ч1ал,
Виридалай багьа тир сад.
И ч1ала заз чирна ватан,
Хайи халкьдин ягьни эдеб,
Дагъни аран тир авадан,
Девлетар хуьн тирди чи деб.
Ч1алан гьар са сес я масан,
Гьана ава ширин аваз.
Гьар лезгидиз я ам дарман,
Гуьлуьшан цав кьилел алаз.
Къариблухда хьайила ван,
Квахьда рик1ин т1ал бейхабар,
Хайи ч1ал я лезгидин чан,
Сугъул рик1е твада сувар.
Лезги ч1ал я халкьдин бине,
Гьар жуьре т1ям галай нямет,
Чи халкь вири кьазвай гине,
Гьавиляй ам твазва вине.
Халкьдикай халкь авурди я
Лезги ч1алан сересвили,
Ч1алан гьунар акурди я,
Хуьзва чи халкь гьевесвили.
Ч1ал девирдин я адалат,
Чи ватанни сад я чи к1вал,
Хьайит1ани бед-гьавалат,
Жедач агъуз вегьез чи ч1ал.
04.02.20
Лезги ч1ал
© Copyright: Нажмудин Шихнабиев 2, 2024
Свидетельство о публикации №124020401937
Свидетельство о публикации №124020401937
Рецензии