Вуч гьарай я, вуч эвер я, дурнаяр,
Тади ийиз, лув гузва хьи кефердиз,
Амукьнат1а яргъа садан к1ани яр-
Са вил ачух зи к1анидан шегьердиз.
Куь гьарайдиз жаваб гурай к1анида,
Белки ярни аквада зи хатадай,
Ам такваз са къуш хьиз зун рекьида,
Аман-минет, са хабар це ватандай.
Лагь, зи рик1е авайди са эрзиман,
Вич акун я, эхир нефес жедалди,
Лукьмандивай жезвач, лагь, заз са дарман,
Къураба яз акъваз тавуй геждалди.
Яргъал тахьуй куь жавабни,дурнаяр,
Хъиткьинзава, лагь, зи рик1ни хуруда,
Са легьзеда акун бес я багьа яр,
Кузвай рик1ив са геренда агудда.
Квез хийирдин сефер хьурай, дурнаяр,
Гагь кефердихъ,гагьни элкъвез кьибледихъ.
Кьисмет хуьурай гьардаз вичин к1ани яр,
Илифиз хьухь зун ялгъуз тир магьледихъ.
21.01.2024.
Дурнаяр
© Copyright: Нажмудин Шихнабиев 2, 2024
Свидетельство о публикации №124012104876
Свидетельство о публикации №124012104876
Рецензии