Вун галачиз к1андач заз югъни йифни,
Рагъ авай гуьлуьшан къуз татуй цифни,
Ви вилерай килигдайвал дуьньядиз,
Цуьк акъатна диганавай гуьнедиз.
Вун галачиз сугъул жеда мел-мехъерни,
Къизгъин жедач рик1ин къене гьиссерни,
Кьурада тар, цуьк ахъагъай гатфариз,
Аваз жедач зи манидин гафариз.
Вун акурла, нурлу хьана алемни,
Къацу хъхьана цуьк кьуразвай къелемни,
Вун агатна дегиш хьана гьаларни,
Живни фена, гурлу хьана вац1арни.
Вун акуна, ачух хьана зи гуьгьуьл,
Бахтуни зи ахъайна жед рик1е гуьл,
Муьгьуьббатдин гьиссерив ац1урна рик1,
Руьгь гьуьндуьрдиз акъудна хьанвай гъарик1.
Уьмуьрни к1андач гьализ вун галачиз,
Жедач шадвални ийиз вун галачиз,
Вил ахъайна къекъвез жеч вун галачиз,
Ич1и я дуьнья багьа вун галачиз.
14.01.2024.
Вун галачиз
© Copyright: Нажмудин Шихнабиев 2, 2024
Свидетельство о публикации №124011404376
Свидетельство о публикации №124011404376
Рецензии
